2 lalaki arestado, ₱40k halaga ng hinihinalang shabu nasamsam sa Bulacan

BULACAN — Dalawang lalaki ang naaresto sa magkahiwalay na operasyon ng pulisya sa Santa Maria at Baliwag City noong Oktubre 10, 2026, kung saan nakumpiska ang kabuuang 6.02 gramo ng hinihinalang shabu na nagkakahalaga ng ₱40,936.

Ayon kay PLTCOL Mark Louie M. Sigua, hepe ng Santa Maria Municipal Police Station, isang 26-anyos na lalaki ang naaresto sa Barangay San Jose Patag bandang alas-10:30 ng umaga matapos umanong mabangga ang isang opisyal ng barangay na nagtangkang pahintuin ang kanyang motorsiklo dahil sa maingay na tambutso.

Habang tinutulungan ng isang barangay tanod ang nasugatang opisyal, itinapon umano ng suspek ang dalawang sachet ng hinihinalang shabu na may timbang na 0.5 gramo at tinatayang halagang ₱3,400. Nahaharap siya sa mga reklamong Resistance and Disobedience to a Person in Authority at paglabag sa Republic Act No. 9165.

Samantala, sa Baliwag City, isang 46-anyos na negosyante ang naaresto sa buy-bust operation ng Drug Enforcement Unit sa Barangay Sto. Cristo bandang alas-1:20 ng hapon.

Ayon kay PLTCOL Eisbon Lucas Llamasares, hepe ng Baliwag City Police Station, kabilang ang suspek sa PNP-PDEA Unified Watchlist bilang Street-Level Individual (SLI).

Nakumpiska mula sa kanya ang limang sachet ng hinihinalang shabu na may timbang na 5.52 gramo at halagang ₱37,536, kasama ang isang marked ₱500 bill na ginamit sa operasyon.

Nahaharap ang suspek sa mga reklamong paglabag sa Sections 5 at 11, Article II ng Republic Act No. 9165, na may kaugnayan sa pagbebenta at pag-iingat ng ilegal na droga.

Dinala ang dalawang suspek sa kani-kanilang himpilan ng pulisya para sa dokumentasyon, habang isasailalim sa laboratory examination ang mga nakumpiskang ebidensya sa Bulacan Provincial Forensic Unit.

Ayon sa Bulacan Police Provincial Office, patuloy ang mga operasyon laban sa ilegal na droga sa ilalim ng pamumuno ni Acting Provincial Director PCOL Jay B. Baybayan.