31-anyos na negosyante, arestado sa Calumpit dahil sa umano'y ilegal na pagdadala ng baril

CALUMPIT, Bulacan — Arestado ang isang 31-anyos na negosyante matapos umanong makuhanan ng baril na walang kaukulang dokumento sa Barangay Poblacion, Calumpit, Bulacan, bandang alas-12:00 ng hatinggabi noong Oktubre 14, 2026.

Ayon kay PLTCOL Leopoldo L. Estorque Jr., hepe ng Calumpit Police Station, nagsasagawa ng pagpapatrolya ang mga pulis nang makatanggap sila ng tawag mula sa isang residente tungkol sa grupo ng mga lalaking umiinom ng alak, kung saan isa umano sa kanila ang may dalang baril.

Agad na rumesponde ang mga pulis, katuwang ang mga barangay tanod. Sa isinagawang pagberipika, napansin umano ng mga awtoridad ang hawakan ng baril na nakasukbit sa baywang ng suspek.

Nang hingan ng mga dokumentong nagpapatunay sa legal na pagmamay-ari o pagdadala ng baril, hindi umano nakapagpakita ng kaukulang papeles ang lalaki.

Nakumpiska mula sa suspek ang isang 9mm SARICAM pistol, isang magazine, at 15 bala.

Dinala ang suspek sa Calumpit Municipal Police Station para sa dokumentasyon habang inihahanda ang kasong paglabag sa Republic Act No. 10591 o Comprehensive Firearms and Ammunition Regulation Act na isasampa sa Office of the Provincial Prosecutor sa Malolos.

Samantala, inaresto ang isa pang lalaking kasama ng suspek dahil sa paglabag sa Municipal Ordinance No. 6, Series of 2017, at ipinagkatiwala sa Barangay Poblacion para sa kaukulang disposisyon.

Bahagi ang operasyon ng JBM Patrol System ng Police Regional Office 3 at Safer Cities Initiative ng Department of the Interior and Local Government (DILG), na naglalayong paigtingin ang pagpapatrolya at pag-iwas sa krimen.