DICT Central Luzon nagbukas ng libreng online training sa Virtual Assistance

CENTRAL LUZON — Nagbukas ang Department of Information and Communications Technology (DICT) Region III, sa pamamagitan ng ICT Literacy and Competency Development Bureau (ILCDB), ng aplikasyon para sa libreng online training sa General Virtual Assistance na nakalaan para sa mga kwalipikadong Pilipinong walang trabaho.

Pinamagatang “SPARK Technical Training on General Virtual Assistance 2.0: A Paradigm Shift in AI-Powered Interaction,” layunin ng programa na mabigyan ang mga kalahok ng praktikal na kasanayan sa virtual assistance, digital productivity, online collaboration, professional communication, at paggamit ng artificial intelligence (AI) tools.

Gaganapin ang training proper mula Nobyembre 3 hanggang 13, 2026, habang nakatakda ang online campaign sa Nobyembre 14 hanggang 28. Ia-anunsyo pa ang petsa ng graduation.

Bukas ang aplikasyon sa mga Pilipinong 18 taong gulang pataas na kasalukuyang walang trabaho, at mas pinapaboran ang mga residente ng Central Luzon.

Kailangan ding makapasa ang mga aplikante sa English at typing tests, magkaroon ng sariling laptop o desktop computer, maaasahang internet connection, at pangunahing kaalaman sa Microsoft Office at Google applications.

Dapat ding handang matuto ng mga bagong digital skills at makumpleto ang buong programa.

Limitado lamang sa 35 kalahok ang training. Magsasara ang registration kapag napunan na ang kinakailangang bilang ng mga kwalipikadong aplikante.

Maaaring magparehistro sa https://tinyurl.com/SPARKR32026.

Aabisuhan sa pamamagitan ng email ang mga kwalipikadong aplikante para sa online interview.

Layunin ng pagsasanay na ihanda ang mga kalahok sa mga oportunidad sa digital workforce, kabilang ang online employment at freelancing.