Pulis na nanakit sa live-in partner, sinibak sa serbisyo ng NAPOLCOM

Tuluyan nang sinibak sa serbisyo ng National Police Commission (NAPOLCOM) si Police Corporal Almar Jerome P. Dela Cruz matapos mapatunayang administratibong nagkasala ng Grave Misconduct at Conduct Unbecoming of a Police Officer kaugnay ng pisikal na pang-aabuso sa kanyang live-in partner.

Sa nagkakaisang desisyon ng Komisyon, isinasaalang-alang ang CCTV footage, pag-amin ni Dela Cruz na nagkaroon ng pisikal na komprontasyon, at ang kanyang pampublikong pagkilala na mali ang kanyang ginawa.

Batay sa mga rekord ng kaso, paulit-ulit na sinaktan at sinuntok ng pulis ang kanyang kinakasama noong Marso 12, 2026, hanggang sa mawalan ito ng malay. Nabanggit din sa imbestigasyon ang naunang insidente noong Hunyo 2025, kung saan sinipa at minura umano niya ang biktima.

Bagama't nagsumite ang complainant ng affidavit of desistance, binigyang-diin ng NAPOLCOM na hindi awtomatikong natatapos ang administratibong kaso dahil sa pribadong pag-areglo kung may sapat na ebidensya ng paglabag.

Bukod sa pagkakatanggal sa serbisyo, ipinataw kay Dela Cruz ang kanselasyon ng kanyang police eligibility, pagkawala ng retirement benefits maliban sa naipong leave credits, at permanenteng pagbabawal na muling makapagtrabaho sa alinmang tanggapan ng pamahalaan o government-owned and controlled corporation (GOCC).

Ayon kay NAPOLCOM Commissioner Rafael Vicente R. Calinisan, walang puwang sa serbisyo ng pulisya ang karahasan at pang-aabuso.

“Ang uniporme ay hindi lisensya para manakit o mang-abuso,” pahayag ni Calinisan.

Dagdag pa niya, kahit magkaroon ng kasunduan sa pagitan ng pulis at ng nagreklamo, maaari pa ring tanggalin sa serbisyo ang isang opisyal kung mapatunayang hindi na ito karapat-dapat magsuot ng uniporme.

Tiniyak ng NAPOLCOM na magpapatuloy ang mga hakbang nito upang mapanatili ang disiplina, integridad, at pananagutan sa hanay ng Philippine National Police.