PUP Pulilan students sumailalim sa graphic design seminar

PULILAN, Bulacan — Nagsagawa ang Office of the Vice Mayor, sa pangunguna ni Vice Mayor Atty. Imee Cruz, ng graphic design seminar para sa mga third-year Entrepreneurship students ng Polytechnic University of the Philippines–Pulilan Campus ngayong Setyembre 25. Ang Entrepreneurship ay kabilang sa mga programang inaalok sa PUP Pulilan.

Pinamagatang “Designs That Sell: Basic Graphic Design for Entrepreneurs,” isinagawa ang seminar sa computer laboratory ng unibersidad upang mabigyan ang mga estudyante ng praktikal na kaalaman sa paggamit ng graphic design sa negosyo at marketing.

Nagsilbing resource speaker si Hieri del Rosario, multimedia artist ng GMA Network Inc. at collaborator ng FPS Media PH. Tinalakay niya ang mga konsepto at kasalukuyang practices sa graphic design, visual branding at digital marketing na maaaring magamit ng mga estudyante sa pagbuo at pagpapakilala ng kanilang mga produkto at serbisyo.

Nakatuon din ang seminar sa aplikasyon ng design principles sa pagbuo ng branding at promotional materials, bilang paghahanda sa mga estudyanteng nagnanais magtayo at magpalago ng sariling negosyo.