Top 2 most wanted sa Bocaue, arestado sa kasong carnapping

BOCAUE, Bulacan — Naaresto ng mga tauhan ng Bocaue Municipal Police Station (MPS) ang isang 51-anyos na lalaking kabilang sa Top 2 Most Wanted Persons sa municipal level dahil sa kasong paglabag sa Republic Act No. 10883 o New Anti-Carnapping Act of 2016.

Isinagawa ang operasyon sa Barangay Lolomboy, Bocaue, bandang alas-5:20 ng hapon noong Oktubre 9, 2026, sa ilalim ng JBM Patrol System.

Ayon kay PLTCOL Gilbert C. Diaz, hepe ng Bocaue MPS, ang naarestong akusado ay isang tricycle driver at residente ng Barangay Lolomboy.

Batay sa ulat ng pulisya, inilabas ng Regional Trial Court Branch 106 sa Quezon City ang warrant of arrest noong Oktubre 9, 2026, na walang inirekomendang piyansa.

Ipinaalam sa akusado ang kanyang mga karapatang konstitusyonal bago siya dinala sa kustodiya ng Bocaue MPS para sa dokumentasyon at kaukulang legal na proseso.

Ayon kay PCOL Jay B. Baybayan, Acting Provincial Director ng Bulacan Police Provincial Office, patuloy ang pagpapatupad ng mga operasyon laban sa mga wanted person bilang bahagi ng JBM Patrol System at PNP Focused Agenda upang mapanatili ang kapayapaan at kaayusan sa lalawigan.