3 public high school sa Pulilan tumanggap ng media kits mula kay Atty. Imee Cruz

PULILAN, Bulacan — Nagbigay si Vice Mayor Atty. Imee Cruz ng media kits sa tatlong pampublikong high school sa Pulilan bilang suporta sa pagsasanay ng mga mag-aaral sa campus journalism at broadcasting.

Tumanggap ng kagamitan ang Sta. Peregrina High School, Engr. Virgilio V. Dionisio Memorial High School, at Gloria Esguerra T.S. Pereña National High School.

Bawat media kit ay binubuo ng isang Lenovo ThinkPad X13 laptop, Yamaha multi-channel mixer, at dalawang Shure SM58 vocal microphones, na maaaring magamit ng mga mag-aaral sa paggawa ng iba't ibang multimedia outputs.

Layunin ng pagbibigay ng kagamitan na palawakin ang journalism training ng mga estudyante mula sa tradisyunal na pagsusulat patungo sa radio at television broadcasting, kabilang ang audio production, news presentation at iba pang multimedia skills.

Inaasahang magsisilbing practical training equipment ang mga media kit upang mabigyan ang mga campus journalist ng pagkakataong magsanay gamit ang mga kagamitang ginagamit sa aktuwal na media production.