43-anyos na babae, arestado sa kasong carnapping sa Pulilan

PULILAN, Bulacan — Arestado ang isang 43-anyos na babae na nahaharap sa kasong carnapping matapos ang isinagawang manhunt operation ng Regional Highway Patrol Unit 3 (RHPU-3) sa Brgy. Tibag, Pulilan, Bulacan.

Kinilala ang akusado sa alyas na “Maria,” residente ng Brgy. Sabang, Baliwag City, Bulacan. Ayon sa ulat, isinagawa ang operasyon dakong alas-10:30 ng gabi sa bisa ng warrant of arrest, kung saan maayos na sumuko ang akusado sa mga awtoridad.

Pinangunahan ang operasyon ni PCOL Sally L. Mangacop, Regional Chief ng RHPU-3. Matapos ang pagkakaaresto, ipinaalam sa akusado ang kanyang mga karapatang konstitusyonal sa wikang Tagalog.

Nahaharap ang akusado sa paglabag sa Republic Act No. 10883 o New Anti-Carnapping Act of 2016. Nagtakda ang Regional Trial Court sa Malolos City ng ₱300,000 na inirekomendang piyansa para sa kanyang pansamantalang paglaya.

Nasa kustodiya na ng Bulacan Provincial Highway Patrol Team ng RHPU-3 ang akusado para sa kaukulang disposisyon at pagbabalik ng warrant sa korte.

Patuloy namang hinihikayat ng Highway Patrol Group ang publiko na maging mapagmatyag laban sa pagnanakaw ng sasakyan at agad na i-report sa pinakamalapit na himpilan ng pulisya ang anumang kahina-hinalang aktibidad.