Alternative work arrangements sa Bulacan at iba pang lugar ipatutupad sa Agosto 20

BULACAN — Ipatutupad ang alternative work arrangements (AWA) sa mga tanggapan ng pamahalaan sa Bulacan at iba pang bahagi ng Luzon bukas, Agosto 20, alinsunod sa Memorandum Circular No. 131.

Bukod sa Bulacan, sakop ng direktiba ang National Capital Region, Abra, Benguet, Ilocos Norte, Ilocos Sur, La Union, Pangasinan, Bataan, Nueva Ecija, Pampanga, Tarlac, Zambales, Batangas, Cavite, Laguna, Rizal, at Occidental Mindoro.

Sa mga pampubliko at pribadong paaralan sa mga nabanggit na lugar, ipatutupad naman ang alternative learning modes at learning continuity measures sa lahat ng antas, maliban kung may ibang direktiba ang kani-kanilang Local Chief Executive.

Tuloy ang operasyon ng mga ahensyang nagbibigay ng basic at health services, disaster preparedness and response, at iba pang mahahalagang serbisyo.

Tiniyak din sa memorandum na ang mga Contract of Service (COS) at Job Order (JO) workers na isasailalim sa alternative work arrangements ay babayaran ng kanilang kaukulang sahod, alinsunod sa umiiral na mga patakaran at regulasyon.

Para naman sa pribadong sektor, nakasalalay sa management ng bawat kumpanya o establisimyento ang suspensyon ng trabaho o pagpapatupad ng alternative work arrangements.