Apat na weather system binabantayan ng PAGASA; malakas na Habagat patuloy na magpapaulan sa Luzon

MANILA, Philippines — Apat na weather system ang kasalukuyang binabantayan ng PAGASA sa loob at labas ng Philippine Area of Responsibility (PAR), habang patuloy na nagdudulot ng malalakas na pag-ulan ang Southwest Monsoon o Habagat sa Luzon at ilang bahagi ng Visayas.

Kabilang dito ang Tropical Depression Pilandok, dalawang tropical depression sa labas ng PAR, at isang Low Pressure Area (LPA).

Huling namataan ang sentro ng Pilandok sa layong 1,160 kilometro silangan ng Extreme Northern Luzon, taglay ang maximum sustained winds na 55 kilometro kada oras at pagbugsong umaabot sa 70 km/h. Halos hindi ito gumagalaw ngunit inaasahang magsisimulang kumilos pahilagang-kanluran.

Ayon sa PAGASA, posibleng pansamantalang lumakas bilang Tropical Storm ang Pilandok bago muling humina bilang Tropical Depression. Maaari itong humina pa bago tuluyang makalabas ng PAR at inaasahang mananatili itong malayo sa kalupaan ng Pilipinas.

Patuloy ding binabantayan sa labas ng PAR ang Tropical Depression Saudel, na dating tinawag na “Obet.” Huling namataan ito 1,215 kilometro kanluran ng Extreme Northern Luzon, taglay ang hanging 45 km/h at pagbugsong hanggang 70 km/h. Hindi inaalis ng PAGASA ang posibilidad na muling pumasok sa PAR ang sistema depende sa magiging direksiyon nito, ngunit hindi ito inaasahang magkaroon ng direktang epekto sa bansa.

Isa pang Tropical Depression ang binabantayan sa kanluran-hilagang-kanluran ng Itbayat, Batanes. Posibleng maimpluwensiyahan ang galaw nito ng sirkulasyon ng Saudel, habang isa sa mga nakikitang scenario ang posibilidad na magkaroon ito ng looping track at muling lumapit sa PAR.

May isa ring LPA na binabantayan sa malayong silangan ng Eastern Visayas. May medium chance itong maging Tropical Depression at posible ring pumasok sa PAR depende sa magiging galaw nito, bagama't hindi pa ito inaasahang direktang makaaapekto sa bansa.

Samantala, nananatiling pangunahing banta ang malakas na pag-ulang dulot ng Habagat, partikular sa Northern at Central Luzon. Posibleng makaranas ng 100–200 millimeters na ulan ang ilang bahagi ng Ilocos Region, Abra at Benguet, habang 50–100 mm naman ang inaasahan sa malaking bahagi ng Cordillera at Central Luzon.

Sa mga susunod na araw, inaasahang mananatili ang malalakas na pag-ulan sa kanlurang bahagi ng Luzon. Pagsapit ng Miyerkules hanggang Huwebes, posibleng umabot sa 100–200 mm ang ulan sa Zambales, Bataan, Benguet at Occidental Mindoro, habang makabuluhang pag-ulan din ang inaasahan sa Cavite, Batangas at iba pang bahagi ng Central Luzon.

Binalaan ng PAGASA ang publiko na huwag maging kampante dahil sa patuloy na banta ng pagbaha at landslide, lalo na sa mga lugar na nakatanggap na ng malaking volume ng ulan nitong mga nakaraang araw.

Kahit walang nakataas na Tropical Cyclone Wind Signal, posible rin ang malalakas na bugso ng hangin sa mga coastal at upland area ng Luzon at Visayas. Pinapayuhan din ang maliliit na sasakyang pandagat na mag-ingat dahil sa maalon na kondisyon ng karagatan, partikular sa western seaboard ng Luzon.