Bahagi ng NLEX sa San Simon binaha; San Fernando SB Entry pansamantalang isinara

PAMPANGA — Naglabas ng traffic advisory ang NLEX Corporation dahil sa water buildup at pagbaha sa bahagi ng San Simon, na nagdudulot ng mabigat na trapiko ngayong Lunes, Agosto 31.

Batay sa update alas-8:00 ng umaga, maaaring dumaan ang mga motorista na patungong San Simon Northbound at Southbound sa San Simon Exit at muling pumasok sa NLEX sa San Simon Entry upang makaiwas sa bahaging binaha.

Pansamantala namang isinara ang San Fernando Southbound Entry dahil sa mabigat na trapiko sa San Simon dulot ng naipong tubig.

Para sa mga biyaherong southbound na nais bumalik sa northbound direction, bukas ang mga U-turn slot bago ang Tulaoc Overpass at bago ang San Simon Interchange.

Nasa lugar na rin ang mga NLEX patrol officer upang umalalay sa mga motorista at pamahalaan ang daloy ng trapiko. Pinapayuhan ang mga bumibiyahe na mag-ingat at maglaan ng karagdagang oras sa paglalakbay.