Bulacan, asahan ang 50–100 mm na ulan hanggang Lunes dahil sa Habagat

BULACAN — Patuloy na makakaranas ang Bulacan ng 50 hanggang 100 millimeters (mm) ng ulan hanggang Lunes, Agosto 31, dahil sa Southwest Monsoon o Habagat, ayon sa Weather Advisory No. 26 ng PAGASA na inilabas alas-5:00 ng umaga ngayong Sabado.

Ngayong Agosto 29, kabilang ang Bulacan sa mga lugar na maaaring makatanggap ng 50–100 mm na ulan, habang mas mataas na 100–200 mm ang inaasahan sa Ilocos Sur, Pangasinan, La Union, Benguet, Bataan, Zambales, Tarlac, at Pampanga.

Mananatili sa 50–100 mm ang rainfall outlook para sa Bulacan bukas, Agosto 30, at sa Lunes, Agosto 31. Kabilang din ang ilang kalapit na lugar gaya ng Pampanga, Nueva Ecija, Metro Manila, Rizal, at Cavite sa mga inaasahang makararanas ng kaparehong dami ng ulan sa bahagi ng forecast period.

Babala ng PAGASA, maaaring mas mataas pa ang aktuwal na dami ng ulan sa mga bulubundukin at matataas na lugar. Posible ring lumala ang epekto ng pag-ulan sa mga lugar na nakaranas na ng malalakas at tuloy-tuloy na pag-ulan nitong mga nakaraang araw.

Pinapayuhan ang publiko, partikular ang mga nasa mabababang lugar at mga komunidad na madaling bahain, na manatiling alerto at bantayan ang mga Heavy Rainfall Warning at Thunderstorm Advisory mula sa PAGASA para sa mas agarang impormasyon sa lagay ng panahon.