Bulacan haharap sa hanggang 100 mm na ulan ngayong weekend dahil sa Habagat

BULACAN — Patuloy na makararanas ng pag-ulan ang Bulacan ngayong weekend dahil sa Southwest Monsoon o Habagat, ayon sa Weather Advisory No. 52 ng PAGASA na inilabas alas-5:00 ng hapon ngayong Setyembre 4.

Mula ngayong araw hanggang Sabado ng hapon, Setyembre 5, inaasahan ang 50–100 millimeters (mm) na ulan sa Bulacan, Tarlac, Pampanga, Metro Manila, Rizal, Cavite, Laguna, Batangas, Occidental Mindoro at Oriental Mindoro. Mas mataas na 100–200 mm naman ang forecast rainfall sa Zambales at Bataan.

Mula Sabado ng hapon hanggang Linggo ng hapon, Setyembre 6, mananatili sa 50–100 mm ang inaasahang ulan sa Bulacan, kasama ang Zambales, Bataan, Tarlac, Pampanga, Metro Manila, Rizal, Cavite, Laguna, Batangas, Oriental Mindoro at Antique. Posibleng umabot naman sa 100–200 mm ang ulan sa Occidental Mindoro.

Pagsapit ng Linggo ng hapon hanggang Lunes ng hapon, Setyembre 7, inaasahan pa rin ang 50–100 mm na ulan sa Zambales, Bataan, Tarlac, Pampanga, Cavite, Batangas at Occidental Mindoro.

Babala ng PAGASA, maaaring mas mataas pa ang aktuwal na dami ng ulan sa mga bulubundukin at matataas na lugar. Maaari ring lumala ang epekto ng panibagong pag-ulan sa mga lugar na nakatanggap na ng malaking volume ng ulan nitong mga nakaraang araw.

Pinapayuhan ang publiko na bantayan ang Heavy Rainfall Warnings at iba pang lokal na weather advisories ng PAGASA Regional Services Divisions, lalo na sa mga lugar na madaling makaranas ng pagbaha at landslide.