Bulacan, makararanas ng 50–100 mm na ulan dulot ng Habagat hanggang Agosto 30

BULACAN — Inaasahang makakaranas ang Bulacan ng 50 hanggang 100 millimeters (mm) ng ulan ngayong Agosto 28 hanggang Linggo, Agosto 30, dahil sa patuloy na epekto ng Southwest Monsoon o Habagat, ayon sa Weather Advisory No. 22 ng PAGASA na inilabas alas-5:00 ng umaga.

Ngayong Biyernes, kabilang ang Bulacan sa mga lugar na maaaring makatanggap ng 50–100 mm na ulan kasama ang Ilocos Sur, Abra, Pangasinan, Pampanga, Tarlac, Nueva Ecija, Metro Manila, Rizal, Cavite, Batangas, Oriental Mindoro, at Antique.

Inaasahang magpapatuloy ang 50–100 mm na rainfall outlook sa Bulacan sa Sabado, Agosto 29, at Linggo, Agosto 30. Samantala, mas mataas na 100–200 mm na ulan ang maaaring maranasan sa ilang bahagi ng La Union, Benguet, Zambales, Bataan, at Occidental Mindoro sa loob ng forecast period.

Babala ng PAGASA, maaaring mas mataas ang aktuwal na dami ng ulan sa mga bulubundukin at matataas na lugar. Maaari ring lumala ang epekto ng pag-ulan sa mga lugar na nakaranas na ng malaking volume ng ulan nitong mga nakaraang araw.

Pinapayuhan ang mga lokal na disaster risk reduction and management offices na magsagawa ng mga kinakailangang hakbang upang maprotektahan ang buhay at ari-arian. Hinihikayat din ang publiko na bantayan ang mga Heavy Rainfall Warning at Thunderstorm Advisory na ilalabas ng mga regional division ng PAGASA para sa mas agarang impormasyon sa kanilang lugar.