Bulacan makararanas ng panaka-nakang ulan dulot ng Habagat; flash flood, landslide posible

BULACAN — Panaka-nakang pag-ulan ang inaasahan sa Bulacan ngayong Lunes, Agosto 31, dahil sa patuloy na epekto ng Southwest Monsoon o Habagat, ayon sa 24-Hour Public Weather Forecast ng PAGASA.

Sa forecast na inilabas alas-4:00 ng madaling araw, maaaring makaranas ang Bulacan ng katamtaman hanggang malakas na pag-ulan, na posibleng magdulot ng flash flood at landslide, partikular sa mga lugar na mababa, flood-prone, at bulubundukin.

Mas malalakas na monsoon rains naman ang inaasahan sa Ilocos Region, Abra, Benguet, Bataan, Zambales, Tarlac at Pampanga, kung saan posible ang pagbaha at pagguho ng lupa dahil sa heavy to intense rains.

Samantala, patuloy na binabantayan ang Tropical Depression Pilandok, na namataan alas-3:00 ng madaling araw sa layong 1,120 kilometro silangan ng Extreme Northern Luzon. Taglay nito ang maximum sustained winds na 55 kilometro kada oras at pagbugsong umaabot sa 70 km/h habang halos hindi kumikilos.

Nananatili rin sa labas ng Philippine Area of Responsibility (PAR) ang Tropical Depression Saudel, na dating tinawag na “Obet.”

Katamtaman hanggang malakas na hanging mula sa timog-kanluran ang inaasahan sa Luzon, habang maaaring maging moderate to rough ang mga karagatan na may taas ng alon na 1.5 hanggang 4 metro.

Pinapayuhan ang mga residente ng Bulacan na patuloy na maging alerto sa posibleng pagtaas ng tubig, lalo na sa mga lugar na nakaranas na ng pagbaha nitong mga nakaraang araw, at subaybayan ang mga susunod na abiso ng PAGASA at lokal na disaster risk reduction and management offices.