Bulacan posibleng makaranas ng hanggang 200 mm na ulan dulot ng Habagat — PAGASA

BULACAN — Posibleng makaranas ang Bulacan ng 100 hanggang 200 millimeters (mm) na ulan hanggang Linggo ng hapon, Agosto 30, dahil sa patuloy na epekto ng Southwest Monsoon o Habagat, ayon sa Weather Advisory No. 28 ng PAGASA.

Sa advisory na inilabas alas-5:00 ng hapon ngayong Agosto 29, kabilang din sa inaasahang makatatanggap ng 100–200 mm na ulan ang Ilocos Sur, Pangasinan, La Union, Benguet, Bataan, Zambales, Tarlac, Pampanga, Metro Manila, Rizal at Cavite.

Mula Linggo ng hapon hanggang Lunes ng hapon, Agosto 31, inaasahan naman ang 50–100 mm na ulan sa Bulacan, kasama ang Tarlac, Nueva Ecija, Pampanga, Metro Manila, Rizal, Cavite, Batangas at Occidental Mindoro.

Mananatili sa 50–100 mm ang rainfall outlook para sa Bulacan mula Lunes ng hapon hanggang Martes ng hapon, Setyembre 1.

Ayon sa PAGASA, maaaring mas mataas pa sa forecast ang aktuwal na dami ng ulan sa mga bulubundukin at matataas na lugar. Maaari ring maging mas malala ang epekto ng panibagong pag-ulan sa mga lugar na nakatanggap na ng malaking volume ng ulan nitong mga nakaraang araw.

Pinapayuhan ang mga lokal na disaster risk reduction and management offices na magsagawa ng kinakailangang hakbang upang maprotektahan ang buhay at ari-arian, partikular sa mga lugar na nanganganib sa pagbaha at pagguho ng lupa.

Nilinaw din ng PAGASA na ang Weather Advisory ay nagbibigay ng mas malawak na 24-hour rainfall outlook sa provincial level, habang ang Heavy Rainfall Warning ay mas panandalian at mas detalyadong babala na umaabot hanggang municipal level. Para sa mga desisyon gaya ng suspensiyon ng klase, pinapayuhan ang publiko na sumangguni sa Heavy Rainfall Warnings na inilalabas ng kaukulang PAGASA Regional Services Division.

Maliban kung magkaroon ng malaking pagbabago sa lagay ng panahon, nakatakdang ilabas ang susunod na Weather Advisory alas-11:00 ng gabi ngayong Sabado.