Bulacan, posibleng makaranas ng malakas na ulan sa Sabado dahil sa Habagat

BULACAN — Posibleng makaranas ang Bulacan ng 50 hanggang 100 millimeters (mm) na ulan sa Sabado, Agosto 29, dahil sa patuloy na epekto ng Southwest Monsoon o Habagat, batay sa Weather Advisory No. 18 na inilabas alas-5:00 ng umaga ngayong Agosto 27.

Mas mataas na 100 hanggang 200 mm na ulan naman ang inaasahan sa Zambales, Bataan, at Occidental Mindoro sa Sabado. Bukod sa Bulacan, kabilang sa 50 hanggang 100 mm rainfall outlook ang Ilocos Sur, La Union, Pangasinan, Abra, Benguet, Tarlac, Nueva Ecija, Pampanga, Metro Manila, Rizal, Cavite, at Batangas.

Ngayong araw, Agosto 27, inaasahan ang 50 hanggang 100 mm na ulan sa Zambales at Occidental Mindoro. Bukas naman, Agosto 28, maaaring maranasan ang kaparehong dami ng ulan sa La Union, Pangasinan, Benguet, Zambales, Bataan, at Occidental Mindoro.

Ayon sa PAGASA, maaaring mas mataas pa ang dami ng ulan sa mga bulubundukin at matataas na lugar. Maaari ring lumala ang epekto ng pag-ulan sa mga lugar na nakaranas na ng malaking volume ng ulan nitong mga nakaraang araw.

Pinapayuhan ang publiko na manatiling alerto sa posibilidad ng pagbaha at pagguho ng lupa at patuloy na bantayan ang Heavy Rainfall Warnings at iba pang opisyal na weather advisories ng PAGASA.