Construction worker arestado sa buy-bust sa Pulilan; ₱40K halaga ng hinihinalang droga nasamsam

PULILAN, Bulacan — Arestado ang isang 52-anyos na construction worker sa buy-bust operation na isinagawa ng Station Drug Enforcement Unit (SDEU) ng Pulilan Municipal Police Station noong gabi ng Setyembre 11 sa isang barangay sa Pulilan.

Ayon sa pulisya, nakumpiska sa operasyon ang humigit-kumulang ₱40,000 halaga ng hinihinalang ilegal na droga mula sa suspek na kinilala lamang sa alyas na “Boboy.”

Nahaharap ang suspek sa mga kasong paglabag sa Section 5 at Section 11, Article II ng Republic Act No. 9165, o Comprehensive Dangerous Drugs Act of 2002, kaugnay ng pagbebenta at pag-iingat ng ipinagbabawal na droga.

Isinailalim sa laboratory examination ang mga nakumpiskang ebidensya upang matukoy ang kanilang komposisyon habang inihahanda ng mga awtoridad ang pagsasampa ng kaukulang kaso laban sa suspek.

Hinimok naman ng Pulilan PNP ang publiko na maging mapagmatyag at makipagtulungan sa mga awtoridad sa kampanya laban sa ilegal na droga.