Dengue cases sa bansa tumaas ng 9% — DOH

Umabot sa 15,763 dengue cases ang naitala sa buong bansa mula Agosto 2 hanggang 15, siyam na porsiyentong mas mataas kumpara sa nakaraang dalawang linggong monitoring period, ayon sa Department of Health (DOH).

Batay sa epidemiological report na may petsang Agosto 29, nakapagtala ng 14,409 kaso mula Hulyo 19 hanggang Agosto 1 bago tumaas ang bilang sa sumunod na dalawang linggo.

Sa kabuuan, 128,634 dengue cases na ang naitala sa Pilipinas ngayong 2026. Gayunman, sinabi ng DOH na mas mababa pa ito ng 39 porsiyento kumpara sa 209,631 kaso na naitala sa kaparehong panahon noong 2025.

Pinaalalahanan ng DOH ang publiko na agad magpakonsulta kapag nakaranas ng mga sintomas gaya ng biglaang mataas na lagnat at matinding pananakit ng katawan. Pinapayuhan din ang mga residente na alisin ang naiipong tubig sa mga lalagyan at iba pang lugar na maaaring pamugaran ng lamok.

Nauna nang sinabi ng kagawaran na naghanda ito para sa posibleng pagtaas ng dengue cases, kabilang ang pagtiyak ng sapat na supplies para sa blood banks at laboratory testing.

Walang partikular na gamot para sa dengue kaya nakatuon ang pangangalaga sa pagpapagaan ng sintomas, sapat na fluid intake, at maagap na pagtukoy sa mga senyales ng severe dengue.