Education Behind Bars Program, patuloy na nagbibigay ng pagkakataon sa mga PDL sa Pulilan

PULILAN, Bulacan — Patuloy na isinusulong ng Pulilan Municipal Jail ang Education Behind Bars Program ng Bureau of Jail Management and Penology (BJMP) upang mabigyan ng pagkakataong makapag-aral ang mga Persons Deprived of Liberty (PDLs) bilang bahagi ng kanilang rehabilitasyon at paghahanda sa muling pagbabalik sa lipunan.

Sa ilalim ng pamumuno ni JINSP Brenden Y. Doria, Officer-in-Charge ng Pulilan Municipal Jail, kasalukuyang naka-enroll ang ilang PDL sa iba't ibang antas ng edukasyon, kabilang ang Elementary, Junior High School, Senior High School, at maging College.

Layunin ng programa na patunayan na hindi hadlang ang pagkakakulong sa patuloy na pagkatuto at personal na pag-unlad. Sa pamamagitan ng edukasyon, inaasahang magkakaroon ng mas maraming oportunidad ang mga PDL upang makapagsimula ng panibagong buhay at maging produktibong miyembro ng lipunan matapos ang kanilang rehabilitasyon.

Kinilala rin ng Pulilan Municipal Jail ang suporta ng kanilang mga katuwang sa pagpapatupad ng programa, kabilang ang Schools Division of Bulacan – Alternative Learning System (ALS), Colegio de San Martin, Inc., at Bulacan State University, na patuloy na nagbibigay ng mga programang pang-edukasyon para sa mga PDL.

Ayon sa BJMP, ang Education Behind Bars Program ay bahagi ng kanilang adbokasiya na isulong ang rehabilitasyon sa pamamagitan ng edukasyon, na nagbibigay ng pag-asa at panibagong pagkakataon sa mga Persons Deprived of Liberty.