Grade 12 NAT proficiency nasa 0.47% lamang — report

MANILA, Philippines — Tanging 0.47% ng Grade 12 examinees sa 2024 National Achievement Test (NAT) ang naitala bilang proficient o highly proficient, batay sa datos ng Department of Education (DepEd) na binanggit sa 2026 State of Philippine Education Report ng Philippine Business for Education (PBEd).

Sa breakdown ng resulta, 65.6% ng examinees ang nasa low emerging level, 27.39% ang high emerging, at 6.54% ang developing. Samantala, 0.45% lamang ang proficient at 0.02% ang highly proficient. Sa kabuuan, 99.53% ang nasa ibaba ng dalawang pinakamataas na proficiency level.

Tinukoy rin ng Second Congressional Commission on Education (EDCOM 2) ang pagbaba ng learner proficiency habang tumataas ang grade level. Batay sa DepEd assessment data na binanggit sa ulat, mula sa humigit-kumulang 30% sa Grade 3, bumababa ito sa 1.36% sa Grade 10 at 0.47% sa Grade 12.

Gayunman, hindi nangangahulugan ang datos na 99.53% ng mga mag-aaral ay “bumagsak.” Ang NAT ay isang system-level assessment na sumusukat sa kakayahan ng mga mag-aaral na maipakita ang inaasahang competencies at ginagamit upang matukoy ang learning gaps sa education system.

Ayon sa PBEd, kinakailangan ang mas mabilis na pagtugon sa foundational learning, learning recovery, teacher quality, kakulangan sa classrooms at learning materials, nutrition, at pagpapatuloy ng mga reporma sa edukasyon.

Inilagay din ng EDCOM 2 ang pagpapataas ng learner proficiency bilang isa sa mahahalagang bahagi ng 2026–2035 National Education and Workforce Development Plan, kasabay ng panawagang tugunan ang learning gaps bago pa ito lumala habang umaakyat sa mas mataas na antas ang mga mag-aaral.