Habagat patuloy na nakaaapekto; hanggang 100 mm na ulan inaasahan sa ilang bahagi ng Luzon

PILIPINAS — Patuloy na nakaaapekto ang Southwest Monsoon o Habagat sa ilang bahagi ng bansa ngayong Agosto 13, ayon sa Weather Advisory No. 46 ng PAGASA na inilabas alas-5:00 ng umaga.

Inaasahang makapagtatala ng 50 hanggang 100 millimeters (mm) na ulan ngayong araw sa Zambales, Bataan, at Occidental Mindoro.

Ayon sa PAGASA, maaaring mas mataas pa ang dami ng ulan sa mga bulubundukin at matataas na lugar. Maaari ring lumala ang epekto ng panibagong pag-ulan sa mga lugar na nakaranas na ng malaking volume ng ulan nitong mga nakaraang araw.

Pinapayuhan ang mga lokal na Disaster Risk Reduction and Management Offices (DRRMO) na magsagawa ng mga kinakailangang hakbang upang maprotektahan ang buhay at ari-arian ng mga residente.

Nilinaw din ng PAGASA na magkaiba ang Weather Advisory at Heavy Rainfall Warning. Ang Weather Advisory ay nagbibigay ng mas malawak na 24-hour rainfall outlook sa provincial level, samantalang ang Heavy Rainfall Warning ay nakatuon sa mas agarang kondisyon sa loob ng susunod na tatlong oras at maaaring maging espesipiko hanggang municipal level.

Para sa mga agarang desisyon tulad ng suspensyon ng klase, pinapayuhan ang publiko at mga lokal na awtoridad na bantayan ang Heavy Rainfall Warnings na inilalabas ng kani-kanilang PAGASA Regional Services Division.

Maliban kung magkaroon ng makabuluhang pagbabago sa lagay ng panahon, nakatakdang ilabas ang susunod na Weather Advisory alas-11:00 ng umaga ngayong Agosto 13.