JBM Patrol System inilunsad ng Pulilan PNP kasabay ng Tanod Day 2026

PULILAN, Bulacan — Pormal na inilunsad ng Pulilan Municipal Police Station (MPS) ang JBM Patrol System kasabay ng pagdiriwang ng Pulilan Tanod Day 2026 ngayong Agosto 29 sa bayan.

Isinagawa ang paglulunsad bandang alas-9:00 ng umaga at dinaluhan ng daan-daang barangay tanod, Barangay Peacekeeping Action Teams (BPATs), mga punong barangay, opisyal ng lokal na pamahalaan, at mga tauhan ng Pulilan MPS.

Ayon sa Pulilan MPS, nakatuon ang JBM Patrol System sa pagpapalakas ng police visibility, mas mabilis na pagtugon sa mga insidente, at koordinasyon sa pagitan ng kapulisan at mga force multiplier sa mga barangay.

Inaasahang makatutulong din ang sistema upang mapahusay ang information sharing, maging mas organisado ang pagpapatrolya, at mapalakas ang mga hakbang para sa crime prevention at public safety sa iba't ibang bahagi ng Pulilan.

Isinabay ang paglulunsad sa taunang Pulilan Tanod Day, na nagbibigay-pagkilala sa serbisyo at kontribusyon ng mga barangay tanod sa pagpapanatili ng kapayapaan at kaayusan sa kanilang mga komunidad.

Binigyang-diin ng Pulilan MPS na mahalaga ang patuloy na koordinasyon ng PNP, lokal na pamahalaan, at mga barangay tanod upang mapalawak ang partisipasyon ng komunidad sa pagpapanatili ng kaligtasan at kaayusan sa bayan.