Mahigit 1,000 mag-aaral dumalo sa Bomb Threat and Safety Awareness Seminar ng Pulilan PNP

PULILAN, Bulacan — Mahigit 1,000 mag-aaral ang dumalo sa Bomb Threat and Safety Awareness Seminar na isinagawa ng Pulilan Municipal Police Station (MPS) sa pangunguna ni PLTCOL Eric C. Cister, Chief of Police, noong Hulyo 28 sa St. Dominic Academy of Pulilan.

Sa seminar, tinalakay ng mga pulis ang iba't ibang usaping may kaugnayan sa kaligtasan at seguridad ng mga mag-aaral, kabilang ang bomb threats at bomb jokes, juvenile delinquency, active shooter incidents, lockdown procedures, at responsableng paggamit ng social media. Layunin ng programa na mapalawak ang kamalayan ng mga kabataan hinggil sa mga banta sa seguridad at sa mga legal na pananagutang kaakibat ng mga gawaing maaaring magdulot ng takot at panganib sa paaralan at komunidad.

Kasabay nito, muling nagpaalala ang Pulilan PNP na ang pagpapakalat ng bomb threats, bomb jokes, prank calls, at iba pang maling impormasyon na nagdudulot ng public alarm ay may kaukulang pananagutan sa ilalim ng umiiral na mga batas. Ayon sa pulisya, patuloy nilang iniimbestigahan ang mga insidenteng may kaugnayan sa ganitong uri ng banta upang matukoy ang mga responsable.

Nagpasalamat naman ang pamunuan ng St. Dominic Academy of Pulilan sa Pulilan PNP para sa isinagawang seminar at tiniyak ang patuloy na pakikipagtulungan sa mga awtoridad sa pagpapanatili ng ligtas na kapaligiran sa paaralan. Inaasahan ding magsagawa ang Pulilan PNP ng kahalintulad na mga seminar sa iba pang paaralan at institusyon bilang bahagi ng kanilang kampanya sa pagpapalakas ng public safety awareness.