Meycauayan River umapaw; ilang lane hindi madaanan, mabigat na trapiko naitala

MEYCAUAYAN CITY, Bulacan — Nagdulot ng pagbaha sa ilang local roads ang pag-apaw ng Meycauayan River, na nakaapekto sa daloy ng trapiko sa Meycauayan Northbound at Southbound ngayong Agosto 29.

Batay sa monitoring bandang alas-2:17 ng hapon, mabigat ang trapiko sa Libtong, Meycauayan Northbound Exit dahil sa pagbaha sa local road, bagama't nananatiling passable ang lahat ng lane sa naturang bahagi.

Sa Meycauayan Northbound at Southbound, hindi naman madaanan ang middle at rightmost lanes dahil sa baha dulot ng pag-apaw ng ilog. Ipinatutupad ang stop-and-go traffic scheme sa lugar.

Nananatiling bukas ang Lane 1 para sa lahat ng uri ng sasakyan, habang ang Lane 2 ay maaari lamang daanan ng Class 2 at Class 3 vehicles. Bumagal naman sa tinatayang 5–10 kilometro kada oras ang takbo ng mga sasakyan.

Bukas din ang U-turn slot sa Meycauayan para sa northbound at southbound motorists na nais bumalik at umiwas sa apektadong bahagi.

Patuloy na mino-monitor ng mga tauhan ang sitwasyon upang makapagbigay ng agarang update at maisagawa ang kinakailangang traffic at safety measures.