Most wanted person sa SJDM arestado sa drug case

SAN JOSE DEL MONTE CITY, Bulacan — Arestado ang isang lalaking kabilang sa City Level Most Wanted Persons ng San Jose del Monte matapos isilbi ng mga awtoridad ang warrant of arrest laban sa kanya noong Setyembre 16 sa Road 2, Daang Barrio, Barangay Gaya-gaya.

Ayon kay PLTCOL Nelson M. Sardin, Chief of Police ng San Jose del Monte City Police Station (SJDM CPS), kinilala ang akusado sa alyas na “Vin,” residente ng Barangay Dulong Bayan. Naaresto siya bandang alas-12:29 ng tanghali sa joint operation ng Warrant and Intelligence Section ng SJDM CPS at 301st Mobile Company, Regional Mobile Force Battalion 3.

Inaresto ang akusado sa bisa ng warrant na inilabas noong Setyembre 4 ni Judge Maria Beatrice Alvarez Caunan ng Regional Trial Court Branch 75 sa San Mateo, Rizal. Kaugnay ito ng kasong paglabag sa Section 11, Article II ng Republic Act No. 9165, o Comprehensive Dangerous Drugs Act of 2002, para sa umano'y possession of dangerous drugs.

Nagtakda ang korte ng ₱200,000 na piyansa para sa kaso. Gumamit din umano ng body-worn camera ang mga operatiba sa operasyon alinsunod sa A.M. No. 21-06-08-SC.

Nasa kustodiya ng SJDM CPS ang akusado para sa kinakailangang dokumentasyon bago iharap sa korte na nagpalabas ng warrant.

Ayon kay PCOL Jay B. Baybayan, Acting Provincial Director ng Bulacan Police Provincial Office, magpapatuloy ang mga operasyon laban sa mga wanted person upang maiharap sa hukuman ang mga indibidwal na may nakabinbing kaso.