Motorsiklo at traysikel nagbanggaan sa bypass road; dalawa ang nasugatan

PULILAN, Bulacan — Dalawang katao ang nasugatan matapos magbanggaan ang isang motorsiklo at traysikel sa kahabaan ng bypass road sa Brgy. Dulong Malabon dakong 3:45 ng hapon noong Hulyo 28.

Batay sa inisyal na ulat, kabilang sa mga nasugatan ang isang 16-anyos na lalaki na residente ng Brgy. Poblacion, Pulilan, na nagtamo ng mga gasgas sa magkabilang tuhod at kaliwang siko. Nasugatan din ang isang 63-anyos na lalaki mula sa Brgy. Balucuc, Apalit, Pampanga, na nagtamo ng paso sa kaliwang binti.

Agad na rumesponde ang mga emergency personnel at nagsagawa ng paunang lunas sa pinangyarihan ng insidente. Sinuri rin ang vital signs ng dalawang biktima bago sila alukin ng transportasyon patungo sa ospital para sa karagdagang pagpapagamot.

Gayunman, kapwa tumanggi ang dalawang biktima na magpaospital. Ayon sa ulat, lumagda sila sa kaukulang waiver bilang patunay ng kanilang pagtanggi sa transportasyon at pagpapaospital. Patuloy pang inaalam ng mga awtoridad ang sanhi ng banggaan.