MPower magsusuplay ng kuryente sa manufacturing facilities ng Big Ben Group sa Pulilan

Photo Courtesy: www.mb.com.ph

PULILAN, Bulacan — Nakakuha ang MPower, retail electricity unit ng Manila Electric Co. (Meralco), ng kasunduan upang magsuplay ng kuryente sa manufacturing facilities ng Big Ben Group sa Pulilan, Bulacan.

Sa pahayag ng MPower noong Agosto 26, sinabi nitong layunin ng partnership na mabigyan ang Big Ben Group ng reliable at cost-competitive na suplay ng kuryente para suportahan ang kasalukuyang manufacturing operations at pangmatagalang expansion plans ng kumpanya.

Ang Big Ben Group ay manufacturer at supplier ng ready-mix concrete na ginagamit sa iba't ibang real estate at commercial infrastructure developments.

Ayon kay Benjamin Eusebio, director ng Big Ben Group, mahalagang maisama sa operasyon ng kumpanya ang sustainable energy practices habang patuloy itong lumalago. Sinabi naman ni company chairman Eusebio Pacifico Garcia na mahalaga ang maaasahan at cost-efficient na enerhiya upang mapanatili ang tuloy-tuloy na operasyon at kalidad ng kanilang produkto.

Binigyang-diin naman ni Redel Domingo, head ng MPower, na nakatuon ang kumpanya sa pagbibigay ng energy solutions na naaayon sa pangangailangan ng kanilang mga kliyente upang mapalakas ang operational resilience ng mga negosyo.

Inilunsad noong 2013, ang MPower ay isang Retail Electricity Supplier (RES) na nagseserbisyo sa commercial at industrial contestable customers sa ilalim ng Retail Competition and Open Access framework ng Electric Power Industry Reform Act.