Nicole Eusebio Fulgencio, itinanghal na MVP sa SEA test match sa Malaysia

Isang panibagong karangalan ang iniuwi ng Pulilenyang atleta na si Nicole Eusebio Fulgencio matapos siyang hiranging Most Valuable Player (MVP) of the Game sa ginanap na Ladies Cup 2026 – South East Asia Test Match sa Kuala Lumpur Polo Club noong Hunyo 28, 2026.

Bilang kinatawan ng Global All-Stars, ipinamalas ni Fulgencio ang kahusayan, disiplina, at husay sa paglalaro na nagbigay sa kanya ng prestihiyosong parangal bilang MVP sa naturang internasyonal na torneo. Ang kanyang natatanging performance ay nagbigay ng karangalan hindi lamang sa kanyang koponan kundi maging sa bayan ng Pulilan.

Bilang pagkilala sa kanyang natatanging tagumpay sa larangan ng sports, nagpasa ng isang resolusyon ang Sangguniang Bayan ng Pulilan upang parangalan si Fulgencio. Kinilala ng konseho ang kanyang tagumpay bilang isang mahalagang inspirasyon sa mga kabataang atleta at sa buong komunidad, na nagpapatunay na ang sipag, dedikasyon, at determinasyon ay nagbubukas ng pagkakataong makilala sa pandaigdigang entablado.

Patuloy namang ipinagmamalaki ng mga Pulilenyo ang naging tagumpay ni Nicole Eusebio Fulgencio, na nagsisilbing huwaran sa mga susunod na henerasyon ng mga atletang nangangarap na iangat ang pangalan ng Pulilan at ng Pilipinas sa mga pandaigdigang kompetisyon.