NLEX magbibigay ng toll rebate sa San Fernando–Pulilan stretch habang nagpapatuloy ang pagbaha

PAMPANGA — Magbibigay ang NLEX Corporation ng toll rebate sa San Fernando–Pulilan stretch, northbound at southbound, kasunod ng pagbaha sa San Simon at Tulaoc na nakaapekto sa daloy ng trapiko sa expressway.

Alinsunod sa direktiba ng Department of Transportation (DOTr), epektibo ang toll rebate simula alas-12:00 ng tanghali noong Setyembre 2 at magpapatuloy hanggang maging passable na sa lahat ng klase ng sasakyan ang lahat ng lane sa naturang bahagi ng NLEX.

Ayon sa NLEX, direktang ibabalik ang rebate sa RFID account ng motorista sa araw pagkatapos ng kanilang toll passage.

Iniugnay ng NLEX ang pagbaha sa patuloy na pag-ulan dulot ng Habagat at mataas na lebel ng Pampanga River. Anila, pinalala ng pag-apaw ng ilog ang kondisyon at nakaapekto sa kakayahan ng lugar na maglabas ng sobrang tubig.

Nag-deploy din ang NLEX ng emergency, maintenance, traffic management, engineering at customer service teams, kasama ang pumping equipment at sandbags, upang tugunan ang water buildup at tumulong sa mga motorista.

Katuwang din sa response operations ang DOTr, DPWH, MMDA, NOLCOM, Philippine Coast Guard at mga lokal at panlalawigang pamahalaan sa Pampanga.

Samantala, hinihikayat ang mga motoristang wala pang RFID na magpakabit nito upang mapadali ang toll transactions at maging kwalipikado sa rebate habang umiiral ang naturang toll relief.