Panahon sa Bulacan bahagyang bubuti; isolated rains posible pa rin dahil sa Habagat

BULACAN — Bahagyang mas maayos na lagay ng panahon ang inaasahan sa Bulacan ngayong Agosto 21, ngunit posible pa rin ang mga panaka-nakang pag-ulan o thunderstorm dahil sa patuloy na epekto ng Southwest Monsoon o Habagat, ayon sa 24-Hour Public Weather Forecast ng PAGASA na inilabas alas-4:00 ng madaling araw.

Ang Bulacan, kasama ang Metro Manila at iba pang bahagi ng Luzon, ay makararanas ng partly cloudy to cloudy skies na may isolated rainshowers o thunderstorms. Nagbabala ang PAGASA sa posibilidad ng flash floods o landslides kapag nagkaroon ng severe thunderstorms.

Samantala, mas maulang kondisyon ang inaasahan sa Ilocos Norte, Ilocos Sur, Apayao, Abra, Batanes, at Cagayan, kung saan posible ang moderate hanggang paminsan-minsang heavy rains.

Binabantayan din sa labas ng Philippine Area of Responsibility (PAR) ang Severe Tropical Storm Saudel. Alas-3:00 ng madaling araw, namataan ito 2,735 kilometro silangan ng Eastern Visayas, taglay ang maximum sustained winds na 95 km/h at pagbugsong hanggang 115 km/h.

Kumikilos ang Saudel pahilagang-hilagang-kanluran sa bilis na 25 km/h.

Bagama't mas maayos ang weather outlook para sa Bulacan kumpara nitong mga nagdaang araw, pinapayuhan pa rin ang publiko na manatiling alerto, lalo na sa mga lugar na nakaranas ng pagbaha at iba pang epekto ng sunod-sunod na pag-ulan.