Pinalawak na libreng tertiary education, nilagdaan bilang batas ni Marcos

Photos by Noel Pabalate/The Philippine STAR

MANILA, Philippines — Nilagdaan ni President Ferdinand “Bongbong” Marcos Jr. ang mga amyenda sa Republic Act No. 10931 o Universal Access to Quality Tertiary Education Act sa isang seremonya sa Malacañang nitong Huwebes.

Sa ilalim ng batas, patuloy na pagkakalooban ng libreng tuition at iba pang school fees ang mga kwalipikadong estudyante sa State Universities and Colleges (SUCs), Local Universities and Colleges (LUCs), at state-run technical-vocational institutions.

Pinalawak din ng mga amyenda ang saklaw ng Tertiary Education Subsidy (TES) upang makapagbigay ng karagdagang suporta sa mga estudyanteng mula sa disadvantaged at underserved sectors, kabilang ang mga kwalipikadong benepisyaryo ng Pantawid Pamilyang Pilipino Program (4Ps).

Saklaw din ng mga pagbabago ang mas maraming gastusing may kaugnayan sa edukasyon upang matulungan ang mga mag-aaral hindi lamang sa pagpasok sa kolehiyo kundi maging sa pagkumpleto ng kanilang tertiary education.

Patuloy ding nagbibigay ng financial assistance sa mga kwalipikadong estudyante sa pamamagitan ng TES at Tulong Dunong Program.

Dumalo sa signing ceremony sina Senate President Sherwin Gatchalian, House Speaker Faustin Dy III, Education Secretary Sonny Angara, at iba pang opisyal ng pamahalaan.