Pulilan MPS, Rank No. 2 sa Outstanding Police Stations sa Bulacan

PULILAN, Bulacan — Muling kinilala bilang Outstanding Police Station ang Pulilan Municipal Police Station (MPS) matapos makamit ang Rank No. 2 sa hanay ng mga Class “A” Municipal Police Stations sa Lalawigan ng Bulacan para sa buwan ng Hulyo 2026.

Nakamit ng Pulilan MPS ang pagkilala batay sa Unit Performance Evaluation Rating (UPER), isang sistema ng Philippine National Police na ginagamit upang masukat at masuri ang performance at operational efficiency ng mga police station sa pagpapanatili ng kapayapaan, kaayusan, at kaligtasan sa kanilang nasasakupan.

Ayon sa Pulilan MPS, ang pagkilala ay resulta ng pagtutulungan ng kapulisan, lokal na pamahalaan, mga stakeholder, barangay officials, at mga mamamayan. Nagpasalamat din ang himpilan kay Mayor RJ Peralta, sa Sangguniang Bayan sa pangunguna ni Vice Mayor Atty. Imee Cruz, mga konsehal, at mga Punong Barangay para sa kanilang patuloy na suporta sa mga programa at aktibidad ng kapulisan.

Inaasahang magsisilbing inspirasyon ang pagkilala upang higit pang mapalakas ang ugnayan ng pulisya at komunidad at maipagpatuloy ang mga programa para sa isang mas ligtas, maayos, at mapayapang Pulilan.