Pulilan PNP at Rescue Team rumesponde sa aksidente sa DRT Highway

PULILAN, Bulacan — Agad na rumesponde ang mga tauhan ng Pulilan Municipal Police Station (MPS) katuwang ang Pulilan Rescue Team sa isang vehicular accident na kinasasangkutan ng motorsiklo sa kahabaan ng DRT Highway, Pulilan, Bulacan ngayong umaga.

Nagsagawa ng agarang pagtugon ang mga awtoridad sa lugar upang matulungan ang mga sangkot sa insidente at matiyak ang kaligtasan sa bahagi ng kalsada kung saan naganap ang aksidente.

Kaugnay nito, muling pinaalalahanan ng Pulilan PNP ang mga motorista na mag-ingat sa pagmamaneho, partikular ngayong tag-ulan kung kailan maaaring maging madulas ang mga kalsada at limitado ang visibility.

Pinapayuhan ang mga motorista na magsuot ng tamang helmet at protective gear, tiyaking nasa maayos na kondisyon ang kanilang sasakyan, iwasan ang overspeeding, at panatilihin ang ligtas na distansya sa ibang sasakyan.

Paalala ng kapulisan, mahalaga ang disiplina at pagiging alerto ng bawat motorista upang maiwasan ang mga aksidente at mapanatiling ligtas ang mga lansangan sa Pulilan.