Robin Padilla pinadalhan ng subpoena ng DOJ

Photo Courtesy: GMA News

MANILA, Philippines — Pinadalhan ng Department of Justice (DOJ) ng subpoena si Sen. Robin Padilla kaugnay ng reklamong obstruction of justice dahil sa umano’y pagtulong kay Sen. Ronald “Bato” dela Rosa na makaalis sa Senate premises habang may umiiral na arrest warrant laban dito mula sa International Criminal Court (ICC).

Inatasan si Padilla na humarap sa panel of prosecutors at magsumite ng kanyang counter-affidavit sa Setyembre 25 at Oktubre 9. Kinumpirma rin ni DOJ spokesperson Polo Martinez na naihatid ang subpoena kay Padilla at kay Lt. Col. Jean Alla Yasin Robles sa Senado nitong Setyembre 15.

Nag-ugat ang kaso sa reklamong inihain ng Philippine National Police-Criminal Investigation and Detection Group (PNP-CIDG) laban kay Padilla at iba pa dahil sa umano’y pagtulong kay Dela Rosa na makaiwas sa pag-aresto. Nahaharap sila sa reklamong paglabag sa Presidential Decree No. 1829, o Obstruction of Justice.

Ayon sa mga awtoridad, nakalabas si Dela Rosa sa Senate premises noong Mayo 14 matapos mapasailalim sa protective custody ng Senado. Si Dela Rosa ay subject ng ICC arrest warrant kaugnay ng alegasyon ng crimes against humanity na may kaugnayan sa mga pagpatay sa kampanya kontra ilegal na droga.

Nauna nang itinanggi ni Padilla na tinulungan niyang makatakas si Dela Rosa. Ayon sa senador, nakisabay lamang sa kanyang sasakyan si Dela Rosa palabas ng Senate building.

Hiwalay ding nahaharap si Padilla sa obstruction of justice complaint sa Office of the Ombudsman kaugnay ng mga pangyayari sa Senado.

Ang pagpapadala ng subpoena ay bahagi ng preliminary investigation at hindi nangangahulugang napatunayang nagkasala si Padilla sa mga alegasyon laban sa kanya.