Seminar laban sa human trafficking, isinagawa sa Pulilan Municipal Building

PULILAN, Bulacan — Isinagawa ngayong araw ang isang seminar bilang paggunita sa Anti-Trafficking in Persons National Awareness Month sa Conference Hall ng Pulilan Municipal Building upang palawakin ang kamalayan ng publiko hinggil sa pag-iwas sa human trafficking.

Dinaluhan ang programa ng mga 4Ps beneficiaries at ilang kabataang Pulilenyo na nakibahagi sa mga talakayan tungkol sa mga panganib ng human trafficking, mga paraan ng pag-iwas dito, at ang kahalagahan ng maagap na pag-uulat ng mga kahina-hinalang aktibidad.

Nagsilbing resource speaker si PLTCOL Eric C. Cister, hepe ng Pulilan Municipal Police Station (MPS), na nagbahagi ng mahahalagang impormasyon ukol sa umiiral na mga batas, karaniwang modus ng mga human trafficker, at mga hakbang upang maprotektahan ang sarili at ang komunidad laban sa ganitong uri ng krimen.

Ayon sa mga organizer, layunin ng seminar na palakasin ang kamalayan ng mga mamamayan, lalo na ng mga kabataan at mga benepisyaryo ng 4Ps, upang makatulong sa pagpigil at paglaban sa human trafficking sa pamamagitan ng tamang kaalaman at pakikipagtulungan sa mga awtoridad.