Shabu, baril nasamsam sa buy-bust sa Pulilan

PULILAN, Bulacan — Arestado ang isang 52-anyos na lalaki matapos ang buy-bust operation ng Pulilan Municipal Police Station (MPS) bandang alas-11:00 ng gabi noong Setyembre 14 sa Barangay Dulong Malabon, Pulilan.

Ayon kay PLTCOL Eric C. Cister, hepe ng Pulilan MPS, kinilala ang suspek sa alyas na “Olan,” residente ng Barangay Inaon. Isinagawa ng Drug Enforcement Unit (DEU) ang operasyon matapos umanong bentahan ng suspek ng hinihinalang shabu ang isang undercover police officer kapalit ng marked money.

Nakumpiska umano mula sa suspek ang limang sachet ng hinihinalang shabu na may tinatayang kabuuang timbang na 5.15 gramo at Standard Drug Price na ₱35,020. Nakuha rin ang isang caliber .38 revolver na may dalawang bala, marked buy-bust money at isang black sling bag.

Dinala sa Pulilan MPS ang suspek at mga nakumpiskang ebidensya para sa dokumentasyon. Isasailalim naman sa drug testing at laboratory examination sa Bulacan Forensic Unit ang hinihinalang shabu upang matukoy ang komposisyon nito.

Inihahanda ng pulisya ang mga reklamong kriminal laban sa suspek para sa mga paglabag sa Republic Act No. 9165, o Comprehensive Dangerous Drugs Act of 2002, at Republic Act No. 10591, o Comprehensive Firearms and Ammunition Regulation Act.

Ayon kay PCOL Jay B. Baybayan, Acting Provincial Director ng Bulacan Police Provincial Office, nagpapatuloy ang mga operasyon ng kapulisan laban sa ilegal na droga at hindi awtorisadong pag-iingat ng mga baril sa lalawigan.