Social media accounts para sa below 13, target ipagbawal sa panukala

Isinusulong sa House of Representatives ang pagbabawal sa mga batang wala pang 13 taong gulang na magkaroon o magpanatili ng social media accounts sa ilalim ng pinagsamang panukalang Children’s Social Media and Online Gaming Safety Act.

Sa ilalim ng panukala, responsibilidad ng mga social media platform na pigilan ang mga batang below 13 sa paggawa ng account. Kapag natukoy ang isang account na pag-aari ng batang wala pang 13, kinakailangang i-disable ito at gumawa ng hakbang upang maiwasan ang muling pagpaparehistro.

Para naman sa mga edad 13 hanggang 17, papayagan ang paggamit ng social media ngunit target limitahan ang ilang features gaya ng infinite scrolling, autoplay, short-form video loops, behavioral targeted advertising, precise geolocation tracking, intrusive notifications, at direct messages mula sa hindi kilalang adults.

Inaatasan din sa panukala ang mga social media service na accessible sa Pilipinas na magkaroon ng local presence. Kabilang dito ang pagpaparehistro sa Securities and Exchange Commission (SEC) at pagtatalaga ng compliance officer na residente ng bansa.

Itinatakda rin ang pagbuo ng Office for Children’s Social Media and Digital Safety sa ilalim ng Department of Information and Communications Technology (DICT), na mangangasiwa sa compliance at age-assurance measures ng mga platform. Ang mga paglabag ay maaaring patawan ng multa mula ₱2 milyon hanggang ₱50 milyon, depende sa bigat at uri ng non-compliance.

Bagama't kasama ang “Online Gaming” sa pangalan ng panukala, nakatuon ang mga probisyon nito sa social at communication features ng gaming platforms—gaya ng chat, livestreaming at content sharing—at hindi sa mismong gameplay o game mechanics.

Mahalagang tandaan na ang panukala ay dumaan pa lamang sa pag-apruba at consolidation sa antas ng House committee at hindi pa umiiral na batas, kaya maaari pang mabago ang mga probisyon nito habang nagpapatuloy ang proseso ng lehislasyon.