Top 2 most wanted ng Pandi arestado sa Malolos

Arestado ang isang 48-anyos na lalaki na kabilang umano sa Top 2 Most Wanted Persons – Municipal Level ng Pandi matapos isilbi ng mga awtoridad ang warrant of arrest laban sa kanya noong Setyembre 16 sa Barangay Mojon, Malolos City.

Ayon kay PLTCOL Norheda G. Usman, Acting Force Commander ng 1st Provincial Mobile Force Company (PMFC), kinilala ang akusado sa alyas na “Amado,” isang driver at residente ng Tondo, Manila.

Naaresto siya bandang alas-9:45 ng gabi ng Tracker Team ng 1st PMFC sa pangunguna ni PMAJ Leonilo P. Caballes, katuwang ang Malolos City Police Station, Pandi Municipal Police Station at 301st Mobile Company ng Regional Mobile Force Battalion 3.

Isinagawa ang pag-aresto kaugnay ng kasong Frustrated Murder sa ilalim ng Article 248 ng Revised Penal Code. Ang warrant ay inilabas ng Regional Trial Court, Third Judicial Region, Branch 104 sa Malolos City noong Abril 21, 2026, na may inirekomendang piyansang ₱200,000.

Matapos ang pag-aresto, isinailalim ang akusado sa kinakailangang dokumentasyon at medical examination bago i-turn over sa Malolos City Police Station para sa kustodiya at kaukulang legal na proseso.

Ayon kay PCOL Jay B. Baybayan, Acting Provincial Director ng Bulacan Police Provincial Office, magpapatuloy ang mga operasyon ng kapulisan upang maaresto at maiharap sa hukuman ang mga indibidwal na may umiiral na warrant of arrest.