Water level ng Angat Dam bumaba sa kritikal na antas; ilang bahagi ng reservoir natuyo

BULACAN — Umabot sa kritikal na antas ang water level ng Angat Dam matapos itong bumaba sa mahigit 152 metro above sea level, ayon sa ulat ng Philippine Atmospheric, Geophysical and Astronomical Services Administration (PAGASA).

Ayon sa PAGASA, mas mababa na ang kasalukuyang lebel ng tubig kaysa sa minimum operating level na 156 metro at malayo na rin sa normal operating level na 180 metro. Dahil sa patuloy na pagbaba ng tubig, lumitaw na ang malalawak na bahagi ng putik sa reservoir, bagama't mayroon pa ring mga lugar na may natitirang tubig.

Sinabi ng weather bureau na kinakailangan ang tuloy-tuloy na pag-ulan sa watershed ng Angat Dam upang muling madagdagan ang suplay ng tubig at maibalik ang antas ng reservoir.

Samantala, nagsagawa ng pagpupulong ang lokal na pamahalaan ng San Jose del Monte, Bulacan kasama ang Metropolitan Waterworks and Sewerage System (MWSS), National Water Resources Board (NWRB), National Irrigation Administration (NIA), at Local Water Utilities Administration (LWUA) upang pag-usapan ang mga pangmatagalang hakbang sa pagtugon sa lumalalang kakulangan sa suplay ng tubig.

Nagbabala rin ang mga awtoridad na posibleng bumaba pa sa 149 metro above sea level ang water level ng Angat Dam pagsapit ng katapusan ng linggo kung hindi mapapabuti ang lagay ng panahon at hindi magkakaroon ng sapat na pag-ulan sa watershed.