Zambales at Bataan, makararanas ng malakas na ulan dulot ng Habagat

PILIPINAS — Patuloy na magdadala ng malakas na pag-ulan ang Southwest Monsoon o Habagat sa ilang bahagi ng Luzon, ayon sa Weather Advisory No. 50 ng PAGASA na inilabas alas-5:00 ng umaga ngayong Agosto 14.

Ngayong araw, inaasahang makapagtatala ng 50 hanggang 100 millimeters (mm) na ulan sa Zambales at Bataan.

Pagsapit naman ng Linggo, Agosto 16, inaasahan ang kaparehong dami ng ulan na 50 hanggang 100 mm sa La Union, Benguet, Pangasinan, Zambales, Bataan, at Occidental Mindoro.

Ayon sa PAGASA, maaaring mas mataas pa ang dami ng ulan sa mga bulubundukin at matataas na lugar. Maaari ring maging mas malala ang epekto ng panibagong pag-ulan sa mga lugar na nakaranas na ng malaking volume ng ulan nitong mga nakaraang araw.

Pinapayuhan ang mga lokal na Disaster Risk Reduction and Management Offices (DRRMO) na magsagawa ng mga kinakailangang hakbang upang maprotektahan ang buhay at ari-arian ng mga residente.

Nilinaw din ng PAGASA na ang Weather Advisory ay nagbibigay ng mas malawak na rainfall outlook sa provincial level, habang ang Heavy Rainfall Warning ay nagbibigay ng mas agarang forecast para sa susunod na tatlong oras at maaaring maging espesipiko hanggang municipal level.

Para sa mga desisyong tulad ng suspensyon ng klase, pinapayuhan ang publiko na bantayan ang Heavy Rainfall Warnings na inilalabas ng kani-kanilang PAGASA Regional Services Division.

Maliban kung magkaroon ng makabuluhang pagbabago sa lagay ng panahon, nakatakdang ilabas ang susunod na Weather Advisory alas-11:00 ng umaga ngayong Agosto 14.