Pagyakap sa Larangan ng Musikan

Habang patuloy na sumisikat ang mga dayuhang awitin, tila unti-unti namang nalilimutan ang napakaraming de-kalidad na musikang Pilipino. Hindi ito dahil kulang sa talento ang ating mga mang-aawit at kompositor. Ang totoo, kulang tayo sa suporta at pagpapahalaga sa sarili nating likha.

Nakakalungkot na mas mabilis pang makabisado ng marami ang bagong banyagang kanta kaysa sa mga awiting gawa ng mga Pilipino. Dahil dito, maraming mahuhusay na lokal na artista ang nahihirapang makilala kahit na mataas ang kalidad ng kanilang musika. Kung tayo mismo ang hindi susuporta sa kanila, sino pa ang gagawa nito?

Hindi nangangahulugang mali ang pakikinig sa internasyonal na musika. Ngunit kung palaging dayuhan ang ating pinipili at binabalewala ang sariling atin, unti-unti nating pinahihina ang industriya ng musikang Pilipino. Bawat pag-stream, pagbili ng tiket sa konsiyerto, o pagbabahagi ng kanilang mga awitin ay malaking tulong upang patuloy silang makalikha ng mas maraming obra.

Ang musikang Pilipino ay hindi lamang anyo ng libangan. Isa itong salamin ng ating kultura, wika, at pagkakakilanlan. Kung nais nating umunlad ang ating sariling industriya ng musika, panahon nang itigil ang pagiging tagahanga lamang ng banyaga at simulang ipagmalaki ang musikang likha ng kapwa Pilipino.