Walang Diploma, Pero Maraming Karanasan? Maaaring Degree na ang Kasunod

Isa sa mga pinakamalaking hamon na kinakaharap ng maraming manggagawang Pilipino ay ang kakulangan ng college diploma. Marami ang may sapat na kaalaman, kasanayan, at mahahabang taon ng karanasan sa trabaho, ngunit hindi makapag-apply para sa mas mataas na posisyon o mas malaking suweldo dahil lamang sa kawalan ng pormal na degree.

Bilang abogado, madalas kong ipaalala na may mga batas at programa ang pamahalaan na nagbibigay ng pagkakataon sa mga manggagawang Pilipino na maabot ang kanilang mga pangarap. Isa na rito ang Expanded Tertiary Education Equivalency and Accreditation Program (ETEEAP).

Ang ETEEAP ay isang programang kinikilala ng Commission on Higher Education (CHED) na nagbibigay-daan upang ang mga natutunan sa trabaho at mga taon ng propesyonal na karanasan ay ma-assess at ma-credit bilang bahagi ng mga kinakailangan upang makakuha ng college degree. Sa madaling salita, kinikilala ng programa na ang pagkatuto ay hindi lamang nangyayari sa loob ng silid-aralan.

Hindi ibig sabihin nito na awtomatikong magkakaroon ng diploma ang sinumang may mahabang karanasan sa trabaho. Dumaraan pa rin ang bawat aplikante sa isang masusing assessment upang matiyak na ang kanyang kaalaman at kasanayan ay tumutugon sa pamantayan ng napiling degree program.

Kung nais mong mag-apply sa ilalim ng ETEEAP, may ilang pangunahing kwalipikasyon na dapat mong matugunan. Kailangan ikaw ay isang Filipino citizen, hindi bababa sa dalawampu't tatlong (23) taong gulang, at may hindi bababa sa limang (5) taong kaugnay na karanasan sa trabahong naaayon sa kursong nais mong kunin. Bukod dito, dapat ikaw ay high school graduate, technical-vocational graduate, o college undergraduate.

Mahalaga ring tandaan na hindi maaaring pumili ng anumang kurso lamang. Ang degree program na iyong aaplayan ay dapat may malinaw na kaugnayan sa iyong kasalukuyan o naging trabaho. Halimbawa, kung matagal ka nang nagtatrabaho sa accounting o finance, maaaring iyon din ang degree program na nararapat mong tahakin sa ilalim ng ETEEAP.

Ang proseso ng aplikasyon ay nagsisimula sa pagpili ng isang CHED Deputized Higher Education Institution na nag-aalok ng ETEEAP. Pagkatapos nito, magsusumite ka ng mga kinakailangang dokumento gaya ng application form, curriculum vitae o résumé, certificates of employment, portfolio ng iyong mga naging trabaho at propesyonal na karanasan, at iba pang academic records na maaaring kailanganin ng paaralan.

Pagkatapos ng pagsusumite ng mga dokumento, sasailalim ang aplikante sa assessment at evaluation. Dito susuriin ng institusyon kung ang lawak ng iyong kaalaman at karanasan ay katumbas ng mga learning outcomes ng napili mong degree program. Depende sa resulta ng assessment, maaaring may mga karagdagang requirements o subjects na kailangan pang kumpletuhin bago maipagkaloob ang degree.

Sa aking pananaw, ang ETEEAP ay isa sa mga pinakamahalagang programang inilunsad upang kilalanin ang halaga ng karanasan sa trabaho. Maraming Pilipino ang naging mahusay na propesyonal dahil sa sipag, tiyaga, at aktuwal na karanasan, kahit hindi nila natapos ang tradisyunal na apat na taong kurso sa kolehiyo.

Kung isa ka sa mga manggagawang matagal nang naglilingkod sa iyong propesyon ngunit pakiramdam mo ay diploma na lamang ang kulang upang mas umunlad ang iyong karera, maaaring panahon na upang alamin kung kwalipikado ka sa ETEEAP.

Ang edukasyon ay hindi lamang nasusukat sa oras na ginugol sa loob ng silid-aralan. Sa tamang programa at tamang pagkakataon, ang iyong mga taon ng pagsisikap sa trabaho ay maaaring maging susi upang makamit ang isang college degree at mas maraming oportunidad sa hinaharap.